قبل لا تسوين تلبيس أسنان من أي نوع لازم تعرفين الأضرار اللي محد يتجرأ يقولها لج

السلام عليكم و رحمة الله و بركاته

انا لاحظت بهالقسم ان بنات وايد حتى لو ماعندهم مشاكل بأسنانهم بس عشان البياض يروحون و يسوون تلبيس
وناس اسنانهم مافيهم شي بس ضرس و لا ضرسين و يروحون يسوون حق صفة اسنان كامله تلبيس

انزين قبل لا تقررون انكم تحكون الضرس ولو مللي واحد
مافكرتوا شنو الأضرار اللي تترتب على عملية حك الضرس و تلبيسه بالسيراميك او غيره؟

اعتقد ان قرار مثل هذا يبيله الواحد يدرسه و يتغاضى شوي عن مسألة ان الاسنان شكلهم حق الناس بيكون حلو
عشان لا يصير فيكم مثل ما صار حق غيركم
و للأسف اتوقع 100% من اللي سووا تلبيس اسنان راح يعانون بالمستقبل

الكلام اللي بكتبه تقدرون تقولون اني سويت فيه بحث و شفت آرارء دكاترة و آراء ناس جربوا التلبيس
يعني مو كلام تأليف

اقروا الكلام عدل و بعدين قرروا اذا العملية تسوى ولا لأ

اولاً: عملية تلبيس الاسنان تتطلب نحت الضرس سواء نحت خفيف او اللي ينحتون الضرس لين يصير جنه عود ضعيف
بكلا الحالتين عملية النحت لو خفيفة راح تتسبب بجعل الأسنان حساسة
و كل ما زاد عدد الضروس اللي راح تتلبس كل ما زادت حساسية الأسنان
تخيلي لو اسنانج حساسة شوي حتى لما تتنفسين هوا بارد بيعورونج
فما بالج طل عمرج ضروسج تعورج؟؟

ثانياً: عشان يلبسون الاسنان لازم ينحك الضرس مثل ما قلتلكم
انزين القشرة ان ذبحت عمرها كثر خيرها ان قعدت 15 سنة (و على فكرة ماراح تقعد 15 سنة بعدين اقولكم ليش)
الحين بعد 15 سنة مو راح تحتاجين تلبيس ثاني؟
انزين بالتلبيس الاول لنفرض حكوا الضرس شوية و حطوا الصمغ و تركب الضرس
المرة الثانية عشان يشيلون القشرة الأولى راح يشرخون الضرس شوي نتفه و لا شالوا القشرة بيكون الضرس مكان الصمغ متضرر عقب 15 سنة فلازم يحكونه مرة ثانية
بس ها
المرة الثانية عشان يحكونه لازم يكون اكثر
ليش؟
اول شي يشيلون الطبقة المتضررة من الصمغ
وثاني شي يحكون عشان يوصلون للمرحلة الي يقدرون يحطون فيها الصمغ مرة ثانية و يثبت التلبيس

لنفرض انج هالسنة سويتي تلبيس اللي يحكون من الضرس نتفه 1 مللي
بعد 10 او 15 سنة غصبن عليج بيحكون ضرسج اكثر و راح تحطين تلبيس اسمك

الحين طافوا 20 او 30 سنة
عقبها على بالج بتقدرين تحكين ضرسج مرة ثالثة؟
سلامتج
أهنيج ضرسج راح انتهى بيشيلون ماتبقى و بيركبون لج جسر أو تركيب ثابت نفس العيايز
لنفرض عمرج 20 سنة الحين
لاصرتي 40 سنة ضروسج عادي تكون تركيب لانج تلفتيهم بشبابج
و بتشوفين عيايز بالخمسين و الستين ضروسهم طبيعية وانتي قعدي عابلي بالتركيب
وعلى فكرة
نسبة كبيرة جداً من الناس ما يقدرون يلبسون مرة ثانية
يعني انا عطيتكم احسن احتمال تلبسين مرتين والثالثة تركيب شئتي أم ابيتي
بس في ناس وايد عقب اول مرة تلبيس مايقدرون يلبسون ثاني مرة لان حسب الضرس شكثر تضرر
فعقب 15 سنة زهبي فلوس زراعة الاسنان
انا اقول من الحين يمعي

انزين و عصب الضرس شلون عليه؟
هذي شغله الدكاترة بيقولون لج انها نادرة الحدوث لكن ناس وايد راح يحتاجون ازالة عصب للاسنان اللي بيلبسونها او يحسون بألم فظيع بعد التلبيس فيضطرون يشيلون العصب بعد التلبيس
يعني انتي مركبة سيراميك 4 ضروس بيشيلون عصب 4 ضروس
مركبة 8 بيشيلون عصب 8
و هلمَ جراً
تعرفين شنو معناة يشيلون عصب الضرس؟
يعني الضرس عبارة عن قطعة بيضا ميتة بحلجج
الضرس مات خلاص
طبعا بهالحالة مليون% ماراح تلبسين مرة ثانيةهي مرة وحدة استانسي 10 او 15 سنة وعقبها الله يكون بعونج

الحين انتي شوفي نفسج بالمنظرة و قيمي
هل اسنانج بحالة من السوء تسوى معاها انج تمرين بكل هذا؟
قاعدة اقولج انج لازم لازم بعد مرحلة معينة راح تركبين جسر او زراعة
مستعدة حق هالشي بس عشان جم سنة لا ضحكتي الناس يحسدونج على ضروسج الحلوة؟

انا حطيت هالموضوع عشان انصح البنات اللي صراحة كاسرين خاطري ركضة من عيادة لي عيادة يدورون احسن العروض
واستغلال مندوبات و سكرتيرات العيادات اللي يعطونج الشمس بايد و القمر بايد عشان تييب زباين للعيادة

رجاءً لا وحدة تدش تقولي الدكاترة دارسين و فاهمين وماراح يقصون عليكم
ادري دارسين
و مليون بالامية درسوهم الاثار الجانبية للتلبيس
بس محد فيهم يتجرأ يقولها
اذا متوسط عملية التلبيس 1000 الى 3000 دينار و سمعت ان في ب 5000 و 6000
تبين الدكتور يقولج لا تلبسين؟

اصحوا و تركوا عنكم التقليد الأعمى للممثلات و المشاهير
هذولي راس مالهم الشكل ماعندهم غير هالويه يعابلون فيه لازم يضبطون روحهم و لا محد يبيهم

انتوا خلكم على طبيعتكم حرام صدقوني بتتأذون و تتحسفون قد شعر راسكم على هالتلبيس حتى لو مستانسين فيه الحين

رجاءً سكرتيرات العيادات بلا دعايات بموضوعي و بسكم جذب على الاوادم
اللي بتسوي دعاية تروح تدفع فلوس وتحط اعلان لاتقعد تقص عالبنات

اللي تبي تعرف و تقرا تجارب ناس مجربين و متضررين وآراء الخبراء تدور بقوقل
side effects of teeth veneers
بتشوفون الهوايل
واللي ماتعرف انجليزي تترجم بقوقل مايبيله شي

بس اقروا عدل عدل عشان بعدين لاحد يلوم الا نفسه

انا من خوفي عليكم قلتلكم هالكلام
و اتمنى اني اكون انقذت البعض من خدعة التلبيس

يما خليجية
جزاج الله خير
جزااج الله خير

صاجه والله اشكثر يلبسوون اسنانهم وهم مايحتاجوون هالشي
كل هذا عشان مايحطون تقويم

بس في حالات تحتاج تلبيس مثل حالتي مااينفع معاي التقويم ف اضطرييت البس اسناني

يوماااااااااااااا والله خرعتيني بس انا بعد سمعت انه حرام وهونت ربي لك الحمد والشكر
وومشكوووره وايد وايد عالنصايح القيمه
اقنعتيني بوجهه نظرج

وازيدج من الشعر بيت

كل من عمل تلبيس

ودخل جسم غريب للاسنانهم

مع الوقت يطلعون ريحه

فوفو

يممممممممممه

عاد انا ناويه البس

بس منظر

اسناني مثاليه تعتبر بس عشان ابيهم احلا اكثر

الحمدالله اني عرفت هالمعلومه

عورتي قلبي انا ملبسه بس كنت مجبورة
والله متاذيه من الريحه لامعجون يفيد ولاغيرة
تعبت وايد وناويه اروح اشوف دكتور شاطر
بس خايفه اعيش مااااساااه مرة ثانيه
والله يكون في عوني
فعلا التلبيس يطلع ريحه
والله كنت بيني و بين نفسي افكر جذي يعني الواحد لازم يفكر حق بعدين لما الوحدة فينا تصير عيوز الاسنان بتصير اهم شي اهي و الشعر
البنات الصغار خل يحطون تقويم و يهتمون بنظافتهم و البياض و انتهت المشكلة ترا مو لازم ابتسامة هوليوود اصلا ساعات يبين انه تركيب والله حرام
تدرين عاد ؟؟؟

حاطتلي ميزانيه 6000 عشان ابي اسوي ابتسامة هوليوود

يا بعد قلبي ما قصرتي عالمعلومات

احس جنج عطيتيني كف و صحيت خليجية

مشكوره اختي عالمعلومات الروعه

بروح بس اسويلي تنظيف لثه و تنظيف اسنان و تبييض منزلي و خلاص

اسناني زينه بس عقب التقويم الناب اليسار ارتفع شوي لفوق و قلت خلاص بسوي تلبيس

اشوه اني قريت موضوعج

الله يجزاج خير

لودنتيل والله وانا بعد انصحج ماتعملين هوليود لانه جد مكلف بس اذا بغيتي في بمركز تيجان لطب الاسنان دكاترة تجميل الاسنان وفي عرض فتح الملف والاستشارة وتنظيف وتبيض الاسنان كااامل ب 79دينار والله وواااايد ناس يجون يعملون تنظيف وتبيض حق العرض اذا بغيتي تسوين هذا رقمي واحجزلج عالعرض اوكي ابرار 96627600 وحياج الله حبيبتي
انزين والعدسات ؟ انا دكتوري قالي ماراح انحت ولا نتفه لان اساسا اسناني صغار و مو طالعين بره ؟ العدسه همن تخرب الاسنان ؟ الي بدون نحت ؟؟؟؟؟؟؟؟

م فهمت
يعني آنآ آللحين شلت عصب ضرس و قآلت لي آلدكتورةة آخر شئ بآلبسه هو و آلضرسين آللي جنبه 😐
يعني م آخليهآ تلبسهم ؟

خرعتيني خليجية عاد انا كنت ميته اسوي ضروسي
و انا ضروسي صفتهم حلوة بس ابي بياض ناصع
الطمع و ما يسوي
مشكورة حبيبتي ربي خلقنا احسن خلقه بس احنا طماعين نبي بعد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Scroll to Top